Ég vaknaði snemma núna síðasta dag þessa árs, glaðvaknaði kl. 1/2 8 og dreif mig bara á fætur, ennþá niðamyrkur úti en notalegt að sitja við eldhúsborðið og borða morgunverðinn við kertaljós og huggulegheit. Betra veður en í gær hætt að rigna og hefur lægt, held samt að við höfum sloppið vel hér á Stöðvarfirði.  Búin að hafa það fínt um jólin en samt svolítið skrýtin  jól þetta árið því ég var að vinna á þorláksmessu og aðfangadag til kl. 8 um kvöldið og því ekki komin heim fyrr en kl. rúml. 9.  Þurfti svo að fara á næturvakt annan í jólum en er búin að  vera í fríi síðan 28. og fer að vinna í fyrramálið.  Þetta blessaðist samt allt. Þegar ég kom heim á aðfangadagskvöld þá var voða jólalegt Alda búin að klára að skreyta og kertaljós út um allt og hún búin að elda hamborgarhrygginn, ég þurfti bara að brúna og steikja kartöflur, var búin að gera sósuna.  Þannig að við frestuðum bara jólunum um nokkra klukkutíma og það er greinilega ekkert mál. Þetta var líka hið notalegasta aðfangadagskvöld og frábært að hafa börnin heima. Hilmar stoppaði því miður stutt og fór aftur suður 28.  fæ að hafa Öldu aðeins lengur en hún fer núna rétt eftir áramót. Ég dreif mig náttúrulega á hjónaballið og var það hin besta skemmtun, maturinn algjört æði og mikið dansað á eftir. Í kvöld ætlum við Alda bara að hafa það notalegt og eftir allt kjötátið ætlum við að elda humar og einhvern rækjurétt nammi namm, það er að segja ef það er til humar í Krónunni þurfum nefnilega að fara þangað á eftir að versla. Enda hér með nokkrum myndum, verst að ég hélt að ég væri búin að stilla myndavélina þannig að fólk væri ekki með rauð augu þegar tekið er með flassi en greinilega var ég ekki búin að því, en það er kannski bara jólalegt að vera með rauð augu um jólin.   GLEÐILEGT ÁR!! og þakka góð samskipti á árinu.

Ungur maður ætlaði að gleðja kærustuna sína á afmælisdaginn hennar, þau höfðu ekki verið lengi saman og eftir dágóða umhugsun þá ákvað hann að kaupa handa henni loðfóðraðar lúffur það væri rómantísk gjöf en ekki of persónuleg. Hann fór í bæinn með yngri systur kærustunnar og hún hjálpaði honum að velja lúffurnar, sjálf keypti systirin sér nærbuxur.
Afgreiðslukonan ruglaði saman pökkunum þegar hún pakkaði hlutunum inn og ungi maðurinn sendi óvart nærbuxurnar til kærustunnar án þess að vita af því. Hann skrifaði hjartnæmt bréf til hennar sem hann lét fylgja pakkanum og að sjálfsögðu ætlaðist hann til þess að hún læsi bréfið áður en að hún tæki
utan af gjöfinni. Bréfið var svohljóðandi: Ég valdi þessa gjöf vegnað þess að þú ert vanalega ekki í svona þegar við förum saman út á kvöldin. Ég hefði valið aðeins lengri ef systir þín hefði ekki verið með mér,en hún er alltaf í svo litlum sem erfiðara er að fara úr... Liturinn er dáldið viðkvæmur, en
afgreiðslukonan sýndi mér sitt eintak sem hún hafði verið í 3 vikur samfleytt án þess að sæist á þeim, ég bað hana að máta eintakið þitt og hún var virkilega sæt. Ég vildi óska að ég fengi að klæða þig í gjöfina í fyrsta skipti vegna þess að ég er viss um að aðrar hendur munu snerta hana áður en að ég fæ tækifæri til að hitta þig. Þegar þú ferð úr mundu þá að blása í þær áður en þú leggur þær frá þér vegna þess að þær verða yfirleitt dáldið rakar... Ímyndaðu þér bara hve oft ég á eftir að kyssa gjöfina á næstu mánuðum, ég vona að þú verðir í þeim á laugardagskvöldið...

Ástarkveðja.
p.s. Nýjasta tískan er að bretta aðeins upp á þær og láta
þetta loðna sjást!